Um áramót 2011/2012 tekur gildi ný trygging, líftrygging sem tengist Starfstryggingu Hagals.

Tryggingin er mótuð í samstarfi við Willis, samstarfsmiðlun okkar í London og Kiln, 

tryggjanda á Lloyd´s, Kiln hafa í nokkur ár annast líftryggingar fyrir

hópa á vegum Hagals, en hafa nú eftir ítarlegar viðræður útfært og samþykkt

tillögur Hagals um líftryggingar fyrir einstaklinga, einkum viðskiptavini okkar.

Áhersla var lögð á þægilega útfærslu. Í boði verða einfaldir pakkar. Bótafjárhæð

verður lægst 5 milljónir króna en hæst 30 mkr, en þar á milli þrepin 10, 15, 20

og 25 mkr.

Iðgjöld verða á svipaðan hátt í 5 ára þrepum, 30-35, 35-40 og þannig áfram að

65 ára aldri. Neðsta þrepið er frá 18-30 ára. Reykingar varða 35% hækkun.

Sama umsóknarblað verður notað í aðalatriðum en nokkrum spurningum

hefur verið bætt við vegna líftryggingarinnar. Þeir sem vilja bæta líftryggingu

við endurnýjun Starfstryggingar gera það með því að gera nýja umsókn á

eyðublaðinu sem finnst á hagall.is / líftrygging. Á baksíðu umsóknar nægir að

merkja við réttan aldursflokk og bótafjárhæð að vali og færa iðgjaldsfjárhæði í

viðkomandi reit.

Dánarbætur vegna slysfara sem fyrir voru með Starfstryggingu standa óbreyttar

til reiðu fyrir þá sem velja slys eingöngu og þá sem ekki eiga rétt til fullrar

líftryggingar.

Um alllangt skeið hefur Hagall þjónað íslenskum sjómönnum, flugmönnum

og sérfræðingum sem starfa erlendis og hafa af ýmsum ástæðum tekið sér

lögheimili utan Íslands, með því að bjóða lækningatrygginguna. Hún tryggir

gegn útgjöldum við sjúkrahúsvist og aðgerðir, en auk þess minni kostnaðarliði

utan spítala og loks heimflutning. Vasaskírteini, sem tryggður réttir fram við

innskráningu er ávísun á tryggjandann, sem tekur við málinu við upphringingu

frá spítala. Minni kostnaðarliðir eru endurgreiddir gegn nótum og reikningum.

Jafnvel þó tryggður láti fljúga sér heim til Íslands, þá þarf hann að greiða allan

kostnað við aðgerð meðan hann er utan íslenska heilbrigðiskerfisins. Kostnaður

við aðgerð getur þá hlaupið á  milljónum króna, sem tryggingin reiðir fram.

Iðgjöld Starfstryggingar hafa staðið óbreytt í þrjú ár, en um þessi áramót breytast

þau lítillega. Ástæðan er sem fyrr, efling bótasjóðs í samræmi

við það álag af tjónagreiðslum sem verið hefur undanfarin ár.

Um áramót tekur nýr samningur gildi og hefur Liberty á Lloyd´s tekið að sér

Starfstryggingar og lækningatryggingar Hagals fjórða árið í röð. Sú breyting

verður þó, að tryggingafélagið AXIS tekur að sér að bera sameiginlega ábyrgð

með Liberty. Stjórnendur AXIS þekkja vel til Hagals frá fyrri tíð, þegar þessi

viðskipti voru í burðarliðnum. Líftryggingar eru jafnframt í höndum Kiln á Lloyd‘s sem

sérhæfir sig í þeirri grein, eins og nánar segir hér að ofan.

Hagall er vörumerki og daglegt heiti á vátryggingamiðluninni Árni Reynisson ehf en starfsemin hófst fyrir 20 árum þegar Árni lét af störfum sem framkvæmdastjóri hjá samtökum viðskiptalífsins. Frá aldamótum hefur félagið notið aðstoðar viðskiptaþjónustunnar Krónos, sem gekk inn í stærra félag, Virtus árið 2005. Virtus veitir alhliða þjónustu auk bókhalds og fjárreiðna, svo sem húsnæði, fjarskipti, móttöku og fundarsali, ritaraþjónustu og endurskoðun.

Vorið 2011 fluttist Virtus inn í nýtt húsnæði að Skipholti 50d.